Andam ang Malacañang sa pagtuon sa gisugyot nga 4-day work week isip kabahin sa mga lakang sa pagdaginot, taliwala sa gilaumang epekto sa nasud sa nagkagrabe nga tensyon tali sa Iran ug Israel.
Sumala ni Palace Press Officer Claire Castro, mahimong tun-an kini sa gobyerno hilabi na kung mograbe ang sitwasyon sa Middle East.
Ingon man nga giklaro ni Castro nga wala pa’y pormal nga diskusyon kabahin sa nahisgutang sugyot.
Mahinumduman nga ang 4-day work week ug ang work-from-home nga kahikayan gipatuman usab sa pipila ka mga opisina sa gobyerno atol sa kataas sa pandemya sa COVID-19.
Samtang gihisgutan ni Presidente Ferdinand Marcos Jr. nga gimandoan na niya ang tanang ahensya sa gobyerno ug ang publiko sa pagpatuman sa mga lakang sa pagdaginot sa enerhiya.
Samtang, nanawagan si Paranaque Rep. Brian Raymund Yamsuan alang sa temporaryo nga pagpatuman sa work-from-home setup ug online nga mga klase aron maibanan ang epekto sa posible nga dako nga pagtaas sa presyo sa lana nga gipahinabo sa mga tensyon sa Middle East.
Sumala ni Yamsuan, ang gobyerno ug ang pribadong sektor kinahanglan nga magplano dayon alang sa flexible work arrangements, samtang ang mga tunghaan nangandam sa pagbalhin ngadto sa online classes kung magpadayon ang krisis.
Miingon siya nga ang sektor sa transportasyon ang unang maapektuhan, nga mahimong hinungdan sa dugang nga palas-anon sa publiko nga naglisod na sa taas nga presyo sa mga palaliton.
Ang presyo sa krudo sa merkado sa kalibutan misaka ngadto sa $82.57 matag bariles human sa kahadlok nga ang Iran mahimong magsira sa Strait of Hormuz, usa ka agianan alang sa dakong bahin sa suplay sa lana sa kalibutan.
