CEBU – Dili pa makatubag sa pagkakarun ang pamunoan sa flag carrier nga Philippine Airlines kung aduna ba’y ‘collection of damages’ kung ugaling mang mapamatud-an nga adunay pagkuwang ang Korean Air hinungdan nga nahitabo ang pag-overshot sa ilahang eroplano sa runway sa Mactan Cebu International Airport.
Gibutyag ni Cielo Villaluna, ang tigpamaba sa Philippine Airlines, nga nagpadayon pa ang imbestigasyon hinungdan nga dili pa sila makaluwat ug pamahayag kalabot niini.
Gidugang pa niini nga ang maong hisgutanan kay anaa na sa ‘governmental level’ ug bugtong ang Civil Aviation Authority of the Philippines (CAAP) ang makabutyag kung aduna ba’y posibli nga pagkolekta ug danyos sa maong panghitabo.
Apektado man ang PAL, apan gisiguro ni Villaluna nga 50% sa ilahang ‘frequencies’ ang nakabalik na pasulod ug paggawas sa MCIA, pinasubay usab sa guidelines sa maong tugpahanan nga partial operation gikan sa alas 5 sa buntag hangtud na sa alas 5 sa hapon ug kini mulanat hangtud sa Nobyembre 8.
Nanghinaut kini nga mabalik ang full operation sa tugpahanan ug sayo nga dili na maabot pa ug duha ka semana.
