Gipalapdan karon sa usa ka inilang Sugbuanong abogado ug accredited International Criminal Court (ICC) lawyer nga si Atty. Rameses Victorious Gatchalian Villagonzalo ang panawagan nga repasohon ug amendaron ang Republic Act 9344 o ang Juvenile Justice and Welfare Act (Pangilinan Law) taliwala sa nagkadaghang duguong insidente sa kriminalidad nga gikalambigitan sa mga menor de edad karong panahona.
Sa pakighininabi sa Bombo News Team, gibutyag ni Atty. Villagonzalo nga sa wala pa hingpit nga napasa ug nahimong balaod ang maong polisiya, personal na siyang nagsulat ngadto sa principal author niini nga si kanhi Senador Francis “Kiko” Pangilinan aron ipahayag ang iyang mga kabalaka.
Matud sa abogado, iyang gipahinumdoman kaniadto ang senador nga lahi ang hisgutanang “petty crimes” (sama sa yano nga kawat tungod sa kawad-on) kon itandi sa mga krimen nga adunay tinuyoang pagplano ug gihimo nga adunay tinuyoang pagplano daan.
Gipasabot ni Villagonzalo nga kon ang usa ka menor de edad makahimo na og organisado ug planadong krimen sama sa pagpamusil o pagpatay kini usa ka tinawag nga kamatuoran nga ang maong batan-on adunay hingpit nga panabot (discernment) ug igong kahibalo sa dautang resulta sa iyang binuhatan.
Ubos sa kasamtangang balaod, ang mga batang ubos sa 15 anyos hingpit nga exempted sa criminal liability, samtang ang nag-edad og 15 ngadto sa ubos sa 18 anyos mahimo lamang manubag kon mapamatud-an sa piskalya nga aduna silay discernment.
Gikuwestiyon ni Villagonzalo kining maong haw-ang sa balaod tungod kay gigamit na kini karon nga panagang sa mga batan-ong kriminal ug mga sindikato, ilabi na sa impluwensya sa social media ug teknolohiya nga naghatag kanila og sayong exposure sa kalibutan sa krimen.
Dugang pa sa ICC lawyer, sayon lamang alang sa uban ang pagdepensa sa kasamtangang balaod ilabi na ni Sen. Pangilinan tungod kay wala pa sila makasinati nga ang mismong sakop sa ilang pamilya ang mabiktima, maabusohan, o madaot sa usa ka menor de edad.
Gawas sa tulubagon sa mga menor de edad, gipahayag usab ni Atty. Villagonzalo nga mahimo nga mag-atubang og legal nga liability ang mga ginikanan, tag-iya sa armas, security agencies, ug bisan ang mga opisyal sa tunghaan kon mapamatud-an nga adunay kakuwang sa pagbantay ug pagpatuman sa mga lagda sa kaluwasan.
Dungan niini, giawhag niya ang kagamhanan nga dunganon ang pagpalig-on sa kampanya batok sa loose firearms o mga ilegal nga armas, pagpahigayon og lapad nga information drive, ug ang mas higpit nga implementasyon sa mga balaod sa paghupot og armas aron mapugngan ang mga susamang trahedya sa umaabot.
