Mokabat sa 453 ka tawo ang nasikop sa Presidential Anti Organized Crime Commission (PAOCC) ug uban pang law enforcement agencies sa pag-raid sa Philippine Offshore Gaming Operator (POGO) hub sa Pasay City kaniadtong, Feb. 26.
Matod pa kay PAOCC Undersecretary Gilbert Cruz, duha na ka tuig nga naga-operate ang nasambit nga hub.
Sa kapin sa 450 ka tawo nga gidakop, 401 niini mga langyaw.
Naglakip kini sa 207 ka Chinese, 132 Vietnamese, 24 Korean, 14 Indonesian, 11 Malaysian, 12 Burmese, samtang usa gikan sa Madagascar.
Gipasabot ni Cruz nga sirado kaniadto ang hub apan nadiskubrehan nga sekretong naglihok sulod sa 7-andana nga building.
Apan, siya miingon nga ang ilang mga kalihokan nausab gikan sa kanhi offshore gaming ngadto sa scamming sama sa love scam, investment scam, ug uban pang matang sa pagpanglimbong nga suki nga ma biktima ang mga Filipino.
Samtang, lakip usab sa nakit-an sa maong edipisyo mao ang 27 ka mga bata ug pipila ka mabdos nga mga babayeng Pilipino.
Dugang pa ni Cruz, wala nagapuyo sa gisulong nga edipisyo ang mga dinakpan kundi gikuha sila ug gipasulod lang didto.
Nagtuo ang PAOCC nga adunay ubang susamang operasyon nga naglihok sa Metro Manila.
Matod ni Usec. Cruz, posibleng moabot ngadto sa 100 ka POGOs ang illegal nga naglihok dinhi.
