Nipasidaan ang Presidential Anti-Organized Crime Commission (PAOCC) batok sa pagkanselar sa pasaporte ni ex-Bamban Mayor Alice Guo ug pagpa-deport sa iyang igsuon nga si Sheila Guo sa China.
Sa usa ka news conference, gipasabot ni PAOCC spokesperson Dr. Winston Casio nga ang pagkanselar sa iyang pasaporte mahimong mopabor kang Guo ug posibling mosangpot nga mabutang siya ubos sa proteksiyon sa United Nations.
Kung si Guo mahimong wala’y estado nga mga indibidwal o mawad-an sa ilang nasyonalidad tungod sa pagkanselar sa ilang mga pasaporte, sila mahimong mga refugee ug maapil sa framework sa UN Commission for Refugees.
Matod sa opisyal, ang usa ka Chinese national nga nakakuha og laing nasyonalidad maglisod na usab sa pagkuha og Chinese citizenship.
Busa bisan og dakong tabang ang pagkanselar sa mga pasaporte ni Guo aron malimitahan ang ilang pagbiyahe, apan mas maayo nga ipabilin na lang sa pagkakaron ang ilang Filipino citizenship.
Matod niya ang katapusang tumong dinhi mao ang pagpanubag kang Guo dinhi mismo sa Pilipinas.
Matud usab ni Casio nga samtang anaa sila sa prisohan, kanselado na ang ilang mga pasaporte ug kung masilbihan na nila ang ilang sentensiya, problema na kung asa sila ilabay o dad-on.
