CEBU – Nailhan na ang patayng lawas sa usa ka lalaki kinsa nakaplagang wala nay kinabuhi sa kangkongan sa Sitio Lawis, Barangay Mambaling.
Giila ang maong biktima nga si Rufino Aballe Villagonzalo, 39 anyos, adunay kapuyo ug lumolopyo sa Sitio Lumboy, Barangay Mambaling.
Atol sa eksklusibong pakighinabi sa Bombo Radyo Cebu sa kapuyo sa biktima nga si Chona Maglasang,nasayran nga gikuha ang biktima sa bana sa pag-umangkon niini gumikan nihangyo kini nga magpatabang ug hakot sa kahoy aron usab kini makakwarta nga dugang sa pangonsumo.
Apan, natingala nalang kini dihang nitext kini sa pag-umangkon ug nahibaw-an nga wala na nila ikauban ang biktima nga si Rufino.
Gani, nibutyag ang pag-umangkon nga gitagaan pa kini og P500 pangpalit og tambal apan wala na niini makahimamat ang kapuyo nga biktima.
Kahinumdoman, nga nakaplagan ang patayng lawas ni rufino alas 5:20 sa Domingo, Pebrero 27,2022 nga adunay mga samad sa abaga, ulo ug ulo nga gikabutyag usab sa kapulisan nga dili nila madeterminar kung agi ba sa pinusilan o binunalan.
