Gipahinumdoman ni Presidente Ferdinand Marcos Jr. ang katawhang Pilipino nga magkinabuhi sumala sa kaisog, nasyonalismo, ug kalig-on ni Gat Andres Bonifacio batok sa walay hustisya.
Kini atol sa pagsaulog sa ika-162 nga anibersaryo sa pagkatawo sa rebolusyonaryong bayani, usa sa mga bantugang bayani sa atong kasaysayan nga nagpasiga sa nagkahiusang mga pagbati, ug nagbukas sa atong mga mata aron makigbatok sa pagpanglupig sa mga Pilipino.
Giawhag sa Presidente ang publiko nga mapreserbar ang dungog ug matuman ang katungdanan sa paghigugma ug pag-alagad sa katawhan, sama sa gipakita ni Bonifacio sa iyang gugma alang sa Inang Bayan.
Sa paghinumdom sa mga mithi nga gibilin sa Supreme Leader, gipasiugda sa Presidente nga ang kaisog ug determinasyon ni Bonifacio nagpabilin nga may kalabutan atubangan sa mga hagit sa modernong panahon.
Matod niya, kini usa ka pahinumdom sa responsibilidad sa matag Pilipino sa pagpanalipod sa mga kagawasan nga gipakigbisogan kaniadto.
Gihatagan usab sa Presidente og pasidungog ang personal nga panaw ni Bonifacio nga naghulma sa iyang pangandoy alang sa usa ka makiangayon ug patas nga katilingban.
