Gisertipikahan ni Presidente Ferdinand Marcos Jr. nga urgent ang balaodnon nga nagtinguha sa pag-amyendar sa Biofuels Act of 2006.
Sa usa ka sulat nga gipadala sa Presidente ngadto kang Senate President Vicente Sotto III nga gipetsahan Marso 16, iyang gihangyo ang hinanaling pagpasar sa Senate Bill No. 1965 nga nag-usab sa Section 5 sa Republic Act 9367 o ang Biofuels Act of 2006.
Sumala sa Presidente, ang balaodnon nagtumong sa pagpagaan sa epekto sa pagsaka sa presyo sa lana taliwala sa nagkagrabe nga geopolitical tensions ug pagkausab-usab sa global oil markets.
Ang lakang gilauman usab nga makatabang sa pagpalig-on sa abilidad sa nasud sa pagsagubang ug paglikay sa posibleng mga pagkabalda sa suplay sa enerhiya sa umaabot.
Ang maong sulat naka copy furnished ngadto kang House Speaker Bojie Dy III ug sa Presidential Legislative Liaison Office alang sa tukmang mga lakang.
