LAPU LAPU CITY, CEBU-Motambong si Presidente Ferdinand R. Marcos Jr. sa 36th Joint Meeting sa UN Tourism Commission for East Asia & the Pacific ug UN Commission for South Asia sa Lungsod sa Lapulapu karong adlawa, Hunyo 28, 2024.
Hinungdan nga gibantayan sa kapolisan sa dakbayan sa Lapu-lapu ang Sheraton Cebu Mactan Resort, kay dinhi ipahigayon ang meeting sa mga delegado uban sa Presidente.
Una nang gipaambit ni Police Major Michael Gingoyon, ang Hepe sa Tourist Police Unit sa Lapu-Lapu City Police Office sa iyang pakighinabi sa Bombo Radyo Cebu nga 100 porsiyento nang andam ang kapulisan alang sa nasangpit nga kalihokan.
Ug aron masiguro ang kaluwasan sa mga delegado nga motambong ug adunay malinawon nga asembliya.
Kung kahinumdoman nga sa wala pa ang pormal nga pag-abli sa kalihokan, hugot na ang ilang pagpangandam ilabi na ug makonsiderar kini nga makasaysayanon nga kalihokan tungod kay mao kini ang unang higayon nga ang Sugbo mao’y nag-host sa UN Tourism Regional Forum.
Sa pikas bahin ang mga delegado sa United Nations (UN) Tourism meetings kay nibisita sa Bojo River sa Aloguinsan.
Diin mainiton silang gi-abi-abi sa lokal nga komunidad, kinsa mipaambit sa ilang mga tradisyon nga may kalabutan sa suba ug sa palibot niini.
Ang mga bisita misakay sa gagmay nga mga bangka, giabagan sa lokal nga mga eco-guides, nga nagpunting sa lain-laing mga tanom ug mananap sa daplin sa suba.
Nahimong posible ang ilang kasinatian sa Aloguinsan tungod sa suporta nga gihatag sa Probinsya sa Sugbo ubos sa pagdumala ni Governor Gwen Garcia.
