Nagpasalamat si President Ferdinand Marcos Jr. sa Canada sa padayon nga suporta niini sa pagmintinar sa kahusay sa West Philippine Sea ug sa pagpatuman sa internasyonal nga balaod ubos sa United Nations Convention on the Law of the Sea (UNCLOS).
Atol sa ilang panaghisgot, giisa sa duha ka lider—si Marcos ug si Canadian Prime Minister Mark Carney—ang pagpalig-on sa estratehikong partnership sa Pilipinas ug Canada, lakip ang kalinaw ug kalig-on sa Indo-Pacific region.
Gihisgutan usab ang padayon nga implementasyon sa Dark Vessel Detection Program sa Canada, nga mitabang sa Pilipinas sa pag-monitor sa kadagatan ug pagbatok sa ilegal nga pangisda ug uban pang illegal maritime activities.
Gipadayag usab ni Marcos ang interes sa Pilipinas nga ipadayon ug palapdan pa ang maong programa sa nasod.
Samtang gisaulog sa Pilipinas ang ika-10 nga anibersaryo sa 2016 Arbitral Tribunal Award, giila ni Marcos ang Canada sa ilang makanunayon nga suporta sa rules-based order sa West Philippines Sea ug sa pagtan-aw sa arbitral ruling isip final ug legally binding.
Gipasiugda usab niya nga ang kooperasyon sa maritime security importante sa pagpanalipod sa soberanya sa Pilipinas ug sa pagmintinar sa kalinaw sa rehiyon.
