Nakahimo og kasaysayan ang Canada human makuha ang labing una niining kadaugan sa FIFA World Cup sa kaugalingong yuta, pinaagi sa usa ka dominante ug makabungog nga 6-0 nga paglampornas batok sa Qatar.
Ang maong kadaugan sa Group B didto sa BC Place sa Vancouver gipangulohan sa hat-trick ni Jonathan David, mga goal gikan nila ni Cyle Larin ug Nathan Saliba, ug usa ka own goal sa Qatar.
Mitan-aw ug ni-cheer pa si Canadian Prime Minister Mark Carney alang sa Les Rouges.
Apan, nadaot ang selebrasyon tungod sa seryosong kadaot sa midfielder nga si Ismael Kone sa ika-51 nga minuto.
Giataki si Kone gikan sa luyo ni Assim Madibo sa Qatar, hinungdan nga na-stretcher kini pagawas sa pitch samtang nag-oxygen.
Human sa VAR review, gi-upgrade ngadto sa red card ang yellow card ni Madibo ang ikaduhang pagpapahawa sa magduduwa sa Qatar human usab nasilotan si Homam Ahmed sa unang bahin.
Usa na lang ka tabla batok sa Switzerland ang gikinahanglan sa Canada aron mag-una sa grupo, samtang mag-abot usab sa Miyerkules ang Qatar ug Bosnia ug Herzegovina alang sa ikatulo nga pwesto.
