Nakauli na sa nasod si Presidente Ferdinand R. Marcos Jr. gabii nga adunay bitbit sa kapin USD21 bilyones nga investment pledges ug gibag-o nga strategic commitments gikan sa Estados Unidos human sa tulo ka adlaw nga opisyal nga pagbisita sa Washington, D.C.
Sa iyang arrival message, ang pagbisita, nga gihimo sa imbitasyon ni US President Donald Trump, nagpamatuod pag-usab sa kalapad ug giladmon sa alyansa sa Pilipinas-US sa tibuok seguridad, ekonomiya, ug geopolitical nga kooperasyon.
Atol sa meeting uban ni Trump, Secretary of State ug National Security Adviser Marco Rubio, ug Defense Secretary Pete Hegseth, gipasiugda ni Marcos ang tahas sa alyansa sa pagpatunhay sa kalinaw ug kalig-on sa South China Sea ug sa mas lapad nga Indo-Pacific, taliwala sa padayon nga pagpanghasi sa China, hinungdan nga nipadayag usab kini pasalamat sa Estados Unidos.
Misaad usab ang US og USD15 milyones nga bag-ong suporta alang sa pagpalambo sa pribadong sektor ubos sa Luzon Economic Corridor, ug USD48 milyones nga dugang foreign assistance.
Gihatagan og gibug-aton sa Presidente ang patas ug tumbas nga pamatigayon isip sukaranan sa umaabot nga relasyon.
Gitapos ni Marcos ang iyang pagbisita pinaagi sa paghatag og imbitasyon kang Trump sa pagtambong sa ASEAN Summit sa Manila sa sunod tuig, nga dungan sa ika-80 nga anibersaryo sa relasyong diplomatiko sa PH-US ug sa ika-75 nga anibersaryo sa Mutual Defense Treaty.
