Gidasig ni Presidente Ferdinand Marcos Jr., ang mga sundalo nga magpabiling nakatutok sa ilang misyon bisan pa sa kagubot ug kasaba sa palibot ilabina sa isyu sa politika.
Gihimo ni PBBM ang maong pamahayag human mibisita sa Southern Luzon Command (SOLCOM) sa Camp General Guillermo Nakar sa Quezon province.
Gipahinumdoman sa Presidente nga ang trabaho sa mga sundalo mao ang pagpatunhay sa kalinaw ug pagpanalipod sa katawhan.
Samtang ang misyon sa Presidente mao ang pagpanindot sa Pilipinas ug dili ang away sa walay pulos nga mga butang.
Gihatagan og gibug-aton sa Presidente nga ang matag usa adunay managsama nga misyon ug kini mao ang pagpanalipod sa katawhan ug sa Republika sa Pilipinas.
Gani, mipasalig ang Presidente sa mga sundalo sa hingpit nga suporta sa administrasyon ngadto sa AFP, PNP, ug tanang empleyado ubos sa SOLCOM.
Gipasalamatan usab ni Presidente Marcos ang mga sundalo sa ilang dedikasyon ug serbisyo sa nasud diin gidasig usab niya sila sa pagpadayon sa ilang maayong trabaho alang sa mas luwas ug mas progresibong Pilipinas.
Ug pagpasiugda sa kamahinungdanon sa panaghiusa aron masiguro ang kalinaw, seguridad, ug kaluwasan sa katawhan ug teritoryo sa Pilipinas.
