CEBU CITY-Hulipan na karong hinapos sa buwan sa Oktubre si Police Brigadier General Debold Sinas isip Regional Director sa Police Regional Office-7.
Kini human gibutyag ni Sinas nga nakadawat na siya og advisory gikan sa PNP headquarters sa camp crame nga posibling ma-assign kini sa National Capital Region Police Office (NCRPO).
Hinoon gitino ni Sinas nga wala pa siya’y nadawat nga order nga sa NCRPO kini hingpit nga madestino apan nakadawat na kini og warning advisory.
Subay niini mapasalamaton si Sinas sa mga kapulisan sa rehiyon-7, sa Sugbuanon ug ingon man sa mga stake holders sa pagsalig kaniya. ‘Mix feelings’ matud pa ang gibati ni Sinas apan nangandam na kini sa iyang hingpit nga pagbalhin.Boot usab matud pa niini nga mapaambit ang mga polisiya nga iyang gihimo sa Rehiyon-7 sa laing rehiyon.
Sulod sa paglingkod ni Sinas niadtong July 1 2018 hangtud Oktubre 9,2019, muabot sa 9,966 ang operasyon nga napahigayon. 14,223 usab ang mga nasikop, 1445 ang accounted sa watchlist, 313 ka mga High Value Target (HVT), 1,132 ka mga Street Level Target (SLT).
Samtang 136 usab ang namatay sa operasyon, 189,110 ang volume sa shabu ug 485 389 ang sa marijuana.454 ang nasakmit nga ecstacuy ug 531 ang nasakmit nga armas.
Sa kinatibuk-an muabot sa 1,285,952,964 ang DDB Value sa Shabu samtang 58, 246, 713 ang DDB value sa marijuana.
