SAN REMIGIO, CEBU- Gipaambit sa usa sa mga survivor ang makalilisang nga kasinatian sa pagkahugno sa gymnasium sa lungsod sa San Remigio, Cebu, atol sa kusog nga linog niadtong Setyembre 30, 2025, nga misangpot sa kamatayon sa iyang mga kauban sa serbisyo.
Sa eksklusibong interbyu sa Bombo News Team, gibutyag ni PO2 Alvin John Diputado, sakop sa Philippine Coast Guard, ang mga gutlo sa kahadlok nga iyang naagian dihang kalit nga ni-explode ang kisame sa ilang dulaanan, samtang bag-o pa lang silang nagsugod sa ikatulong hugna sa ilang basketball league.
Sa iyang pagkasayod, nagkagubot na sa sulod, ang kisame ug mga haligi nangatumba, ang mga tawo nanagan sa kasamok samtang ang uban wala nay kapasidad nga makagawas tungod sa pagkahugno sa mga debris.
Human sa linog, gisusi ni Diputado ang kahimtang sa iyang mga kauban, apan wala siyay nadungog nga tingog gikan sa tulo kanila.
Nasayod siya nga anaa kini sa dapit nga doul sa haligi, usa ka risgong posisyon nga possible hinungdan sa nga nadat-ugan sila sa naguba nga estruktura.
Sa ilang retrieval operation, nasuta nga nadat-ugan sa haligi ang tulo ka Coast Guard personnel, usa ka bombero, ug usa pa ka gituohang referee sa dula.
Bisan pa sa ilang paningkamot nga buhion sila pinaagi sa CPR ug daliang pagdala sa tambalanan, wala na sila’y kinabuhi pag-abot sa ospital.
Alang kang Diputado, wala siyay gustong basulon sa trahedya, kana gumikan kay kalamidad kini nga walay gipili, ug ang labing importante mao ang pagpanalipod sa kaugalingon pinaagi sa presence of mind ug pag-ampo.
Ang makalilisang nga trahedya ang nahitabo human sa kusog nga linog nga miigo sa lugar, mikalas og 20 ka kinabuhi sa San Remigio lamang.
Daghan usab ang naangol ug naapektohan sa maong kalit nga linog.
