Gipahibalo sa Partido Demokratiko Pilipino (PDP) nga dili nila dawaton o suportahan ang mga politiko nga mopabor sa impeachment case batok kang Vice President Sara Duterte kon modagan ubos sa ilang partido.
Sa usa ka pahayag, giingon sa PDP nga kadtong mga opisyal nga mobotar pabor sa impeachment dili na tugotan nga makabalhin o modagan ubos sa ilang partido.
Dugang pa, posibleng maapil sa blacklist ang mga miyembro nga mopabor sa maong lakang ug ang partido mahimong mosuporta sa ilang mga kontra nga kandidato sa umaabot nga eleksyon.
Gipasiugda sa PDP nga dili kini hulga kondili kabahin sa “political accountability,” ilabi na sa ilang giingong “politically driven impeachment” batok sa Bise Presidente.
Samtang, si Bise Presidente Sara Duterte miingon nga siya karon usa ka “presumptive candidate” alang sa 2028 presidential elections human sa iyang kanhing pahayag sa plano sa pagdagan.
Ang House of Representatives gikatakdang moboto sa Articles of Impeachment batok kaniya karong Lunes, Mayo 11.
