Nahimong init na usab nga hisgutan sa social media ang pagpasabot sa Korte Suprema bahin sa paggamit sa mga photocopy sa mga dokumento isip ebidensya sa korte.
Kini human gikuwestiyon sa abogado sa depensa nga si Atty. Carlo Narvasa ang pipila ka mga dokumentong gipresentar sa prosekusyon atol sa impeachment trial ni Bise Presidente Sara Duterte, nga iyang giingong kini tanan mga photocopy lamang.
Tungod niini, gipaambit pag-usab sa mga netizen ang pahayag sa Korte Suprema nga gi-isyu niadtong Mayo 9, 2025.
Matod niini, ang usa ka duplicate o photocopy sa orihinal nga dokumento mahimong dawaton isip ebidensya, basta walay tinuod nga pagduhaduha sa authentic sa orihinal ug ang paggamit sa kopya dili makahatag og dili patas nga bentaha sa bisan unsang partido.
Kini gibase sa desisyon sa Korte Suprema sa kasong People of the Philippines v. Ybo Lastimosa, diin gitugotan sa korte ang paggamit sa photocopy sa death certificate isip kabahin sa ebidensya.
Bisan pa niini, giklaro sa Korte Suprema nga bisan kon madawat ang usa ka photocopy isip ebidensya, ang gibug-aton o bili niini magdepende gihapon sa ubang ebidensyang mosuporta niini.
Sa maong kaso, gipadayon sa Korte Suprema ang silot nga reclusion perpetua batok kang Ybo Lastimosa human siya napamatud-ang sad-an sa kasong pagpatay.
