CEBU – Mokabat sa Php 1.3 milyones ang kantidad sa gituhu-ang shabu nga nasakmit gikan sa mga giingong pushers og supplier sa Guadalupe area ning dakbayan sa Sugbo.
Natanggong na sa Guadalupe Police Station lock-up cell ang tulo ka mga suspek kinsa nasikop atol sa buybust operation sa managlahing dapit sa naasoy’ng brgy.
Alas tres trenta ganinang kadlawon nasikop sa otoridad sa Guadalupe Police Station ang mga suspek nga nailang sila Wendel Gabutan og Reymart Villaseran, hingkod ang panu-igon og nagpuyo sa maong barangay. Nasikop ang duha samtang ni-agi kini sa gipahigayong checkpoint sa may utlanan sa Brgy. Guadalupe og Brgy. Sapangdaku ning dakbayan.
Nakuha gikan niini ang di mominos sa 10 gramos sa shabu nga anaa sa Php 68, 000 ang kantidad samtang aduna usa’y nakuha nga .22 revolver nga nasakmit gikan sa mga dinakpan diin anaa sa tulo ka bala ang naka-load niini.
Samtang sikop usab ang gitudlong supplier sa duha nga unang nadakpan atol sa gihimong follow up operation sa kapulisan sa Brgy. Kalunasan diin naila ang suspek nga si Mark John Marata 22 anyos, residente sa mao gihapon nga lugar.
Ni-abot sa 200 gramos nga gituhu-ang shabu ang nasakmit gikan niini nga adunay balor nga mokabat sa Php 1.3 milyon.
Nag-atubang na sa kasong Illegal Possession of Firearms og kalapasan sa Republic Act 9165 o Comprehensive Dangerous Drugs Act of 2002 ang mga dinakpan.
