Andam ang Pilipinas nga magpadala og laing contingent sa Myanmar, diin miigo ang 7.7 magnitude nga linog, nga mikalas og kapin sa 3,300 ka tawo.
Sa usa ka pamahayag, gipasalig ni Office of the Civil Defense Administrator Ariel Nepomuceno nga kung magkinahanglan og dugang tabang ang Myanmar, andam ang Pilipinas nga mopakatap og dugang humanitarian contingent hulip sa unang team nga gipadala, nga gikatakdang mobalik sa nasod karong Abril 12.
Matod sa opisyal, ang mga Filipino nga gustong i-repatriate mahimong maapil sa pagbalik sa humanitarian contingent sa Pilipinas.
Kahinumduman nga moabot sa 91 ka mga sakop sa Philippine contingent ang niabot sa Myanmar ug kasamtangang mitabang sa paghatag og medical assistance ug search and rescue operations sa mga lugar nga naigo sa kusog nga linog.
Sa gipaambit nga update sa OCD, gikataho nga si Contingent Commander Lt. Col. Erwen Diploma sa Philippine Air Force, nga ang Urban Search and Rescue (USAR) team sa nahugno nga Jade City Hotel site diin gipakatap ang mga team gikan sa Pilipinas, Myanmar, Vietnam ug Indonesia aron motabang sa pagpangita sa posibleng mga biktima nga natanggong sa building.
Ang Philippine Emergency Medical Assistance (PEMAT) Visayas nagsugod na usab sa paghatag og libreng check-up ug tambal uban sa mga representante gikan sa Myanmar Ministry of Health ug Ministry of Information.
Bisan pa sa mga hagit nga giatubang sa search and rescue team sa PH sa pagpangita sa hotel diin nahugno ang ground floor niini, tungod sa limitado nga komunikasyon ug sa hilabihang kainit sa panahon, apan epektibo nga nakahimo ang grupo sa ilang mga operasyon.
Nakatutok ang team sa USAR sa pag-recover sa mga biktima sa hotel, bisan og nalangan kini tungod sa dagkong mga debris ug ang tanan nga mga kawani gi-account ug anaa sa maayong panglawas.
Gipasalig usab sa PH Inter-Agency Humanitarian Contingent nga pasalig kini sa pagtabang sa mga apektadong komunidad sa Myanmar.
