CEBU CITY-Malampusong gipahigayon ang pinaka-unang “Fisherfolks Summit” sa dakbayan sa Sugbo niadtong adlaw sa Sabado, Nobyembre 23, 2024.
Naghupot kining sa temang “Pagbuhi sa Kabaybayonang Panginabuhi sa Siyudad sa Sugbo”.
Gisalmotan ang maong panagtigom sa mga opisyales sa 17 ka mga asosasyon sa mga mananagat gikan sa mga coastal barangay sa Ermita ngadto na sa Inayawan ning dakbayan sa Sugbo.
Matud pa ni Ed Karlon Rama, ang Executive Director sa Bantay Dagat Commission sa dakbayan diin pipila sa mga gihisgutan sa summit ang bag-ong mga polisiya sa administrasyon ni Cebu City Mayor Raymond Alvin Garcia kalabot sa pagpanagat sa kadagatan nga sakop sa dakbayan.
Pipila sa maong mga lagda mao ang kinahanglang sa pagparehistro sa mga mananagat, apil na ang ilang mga baroto (pumpboat) ug mga kahimanan nga gigamit sa pagpanagat, subay sa City Ordinance No. 2447.
Dugang ni Rama nga gituyo ang Fisherfolks Summit aron kahatagan og kahigayunan nga makapadangat sa ilang mga pangutana ngadto sa mga “regulatory agencies” sa gobyerno ang mga lokal nga mananagat.
Kini nga mga ahensya kay mao ang Bureau of Fisheries and Aquatic Resources (BFAR), Philippine Coast Guard (PCG), Maritime Industry Authority (MARINA), Cebu City Department of Veterinary Medicine and Fisheries (DVMF), Maritime Police, Philippine Navy, ug Cebu City Agriculture Office (CAD).
