CEBU-Mideklarar og walay face-to-face classes ang pipila ka mga Local Government Units diri sa Sugbo atol sa kasaulogan karong adlawa sa ika-39 nga anibersaryo sa EDSA People Power Revolution Martes, Pebrero 25, 2025.
Ang maong mga LGUs kay ang dakbayan sa Mandaue, dakbayan sa Lapu-Lapu, dakbayan sa Talisay ug dakbayan sa Carcar diin ilaha kini gipahibalo pinaagi sa ilang mga Public Information Offices online.
Samtang ang dakbayan sa Sugbo kay wala mideklarar sa susamang kamanduan nga nagpasabot nga normal ang operasyon sa mga trabaho ug klase sa dakbaya.
Sa pikas bahin kay sukad niadtong miaging semana kay aduna nay mga tunghaan nga mideklarar og walay klase o di ba kaha modular learning og mao kini ang musunod:
- Matias H Aznar Memorial College of Medicine, Inc.
- University of San Carlos
- University of the Philippines – Cebu
- St. Alphonsus Catholic School – Lapu-Lapu City, Cebu Inc.
- Saint Louis College – Cebu
- Colegio de la Inmaculada Concepcion, Inc. (both Mandaue and Cebu City Campus)
- University of San Jose-Recoletos
- Adventist Academy Cebu
- Einstein School Cebu
- Cebu Technological University – Main Campus
Gani ang University of the Visayas kay mideklarar nga walay klase dili tungod sa EDSA holiday apan sa paghandom sa ika-4 nga death anniversary ni Dr. Jose “Dodong” Gullas kinsa kanhi Sugbuanong kongresista ug tigdumala sa maong unibersidad.
Ang EDSA People Power Revolution kay gitanyag sa tibuok kalibutan nga bloodless revolution kay walay kinabuhing nakalaas sa 4-ka adlaw nga lihok-protesta sa tibuok katawhang Pilipino batok sa sobra 20-ka tuig nga pagdumala sa remiheng Marcos Sr. sa pagpanumbalik sa diwa sa demokrasya sa nasud nga Pilipinas niadtong tuig 1986.
