CEBU – Nahisusama sa hugaw nga sapa ang kadalanan sa dakbayan sa Sugbo, Talisay ug Mandaue niadtong Miyerkules sa hapon tungod daghang mga urban barangay ang nakasinati og kusog nga baha.
Kini halos kaparehas nga sitwasyon niadtong Martes, Hunyo 5, 2022, sa dihang niresulta sa kusog nga pagbaha ang pagbuhagay sa kusog nga ulan.
Naglangoy-langoy ang mga bata sa lapokon nga tubig sa Barangay Mambaling samtang niabot sa hawak ang tubig baha atol sa kusog nga ulan niadtong Hulyo 6, 2022.
Samtang sa Barangay Tisa , daw sama sa usa ka fountain tan-awn ang pagbuhagay ug pagbugwak sa tubig nga gikan sa mga kanal.
12 ka mga barangay sa dakbayan sa Sugbo ang gimonitor sa Cebu City Disaster Risk Reduction and Management Office tungod sa halos taga-hawak nga baha.
Samtang sa dakbayan sa Talisay, nahisusama sa usa ka suba tungod sa halapad nga baha ang national highway habig sa Bulacao paingon sa Tabunok, Talisay City.
Susamang kasinatian ang nahiguaman sa mga motorista sa may Barangay Subangdako ug Tipolo sa dakbayan sa Mandaue nga nakapahasol sa mga motorista og napugos sa pagpangita og laing dalan nga maagian.
Gawas niini, aduna usay mga lugar nga nakatala og pagdahili sa yuta susama nalang sa Barangay Kalunasan ug Barangay Guadalupe sa dakbayan sa Sugbo.
