CEBU CITY-Nagpadayon ang pagpalambo sa kapulisan sa tibuok Pilipinas sa Cyber security human mabatyagan nga nagkadaghan ang nabiktima sa internet.
Tungod niini ang Philippine National Police nagpahigayon og mga training batok sa cyber crime pinaagi sa mga pag-abag sa laing ahensya sa gobyerno.
Matod ni Police Lieutenant Colonel Gerard Ace Pelare ang tigpamaba ni Police Brigadier General Anthony Aberin hepe sa Police Regional Office 7 nga adunay mga personnel sa kapulisan sa Central Visayas nga gipaubos sa training aron i-upgrade ang ilang technical expertise sa pag susi hilabi na sa cyber crime offenses.
Kung mahuman na ang maong nagpadayon nga training kinahanglan nga ang matag police station adunay duha ka personnel ang well-trained ‘cybercops’ nga maoy mo atiman sa publiko kinsang mga nabiktima online.
Apan giklaro ni Pelare nga kung dinagko na nga krimen ug dili na kaya sa mga Police Station sa paghatag og solusyon, mao na kini ang higayon nga mosulod ang buhatan sa Anti-Cyber Crime Unit sa matag rehiyon nga dunay kapasidad arun hingpit nga mahatagan og hingpit nga kasulbaran ang maong online criminals.
Hinungdan nga hugtanon nga giawhag ang publiko nga dili magpabiktima ug magbinantayon sa internet hilabi na sa mga pasalig nga walay lig-on nga tinubdan.
