PROVINCE OF CEBU- Gikompirmar ni Cebu Provincial Information Office (PIO) head Ainjeliz dela Torre-Orong niadtong Huwebes, Setyembre 4, nga posibleng adunay kausaban sa han-ay sa mga empleyado sa Kapitolyo sa Sugbo human sa pagsusi sa ilang performance.
Matod ni Orong, gihatagan ni Gobernador Pamela Baricuatro og tulo ka buwan nga evaluation period ang tanang empleyado sukad siya misugod sa iyang administrasyon niining tuiga.
Tumong niini nga mahatagan ang mga kawani og higayon nga mapamatud-an ang ilang kapasidad ug bili sa serbisyon publiko.
Gibutyag ni Orong nga ang mando sa gobernador klaro ug prangka — nga ang matag empleyado kinahanglan magpakita og resulta, bisan unsa pa ang ilang employment status.
Gipasiugda usab niini, nga ang paningkamot alang sa transparent ug accountable nga serbisyong publiko gibanabana sa kamatuoran nga kwarta sa katawhan ang gigamit sa pagbayad sa ilang sweldo.
Apil sa evaluation ang mga department heads, ug si Orong mismo miingon nga sila usab mopaubos sa maong assessment aron masuta ang ilang epektibidad sa pagpanguna sa tagsa-tagsa nila nga mga departamento.
Base sa talaan sa Human Resource and Development Office sa probinsiya, ang Kapitolyo aduna nay 3,417 ka mga empleyado sa payroll niini.
Sa kinatibuk-an, 733 ang permanenteng kawani, 292 ang casual workers, 21 ang elected officials, ug 233 ang nagserbisyo ubos sa co-terminus status, samtang ang kinadak-ang grupo naglangkob sa mga job order employees, nga mikabat sa 2,138.
Ang mga permanenteng kawani adunay bug-os nga termino, ang mga kaswal nga temporaryo nga nagserbisyo, ang mga napili nga opisyal nga adunay mandato, ug ang mga co-terminus nga empleyado magpabilin lamang hangtud matapos ang ilang katungdanan.
