CEBU CITY-Gipahibalo sa lokal nga transport group sa Sugbo nga dili sila moduso og petisyon alang sa usbaw sa plitehan taliwala sa sunodsunod nga pagsaka sa presyo sa produktong petrolyo.
Matud pa ni Greg Perez, ang Chairperson sa Pagkakaisa ng mga Samahan ng Tsuper ug Operator Nationwide (Piston)-Cebu nga dili sila mubabag sa mga petisyon sa Metro Manila-based transport groups alang sa P2 ngadto sa P5 nga minimum nga usbaw sa plitehan sa jeepneys, apan dili sila moduso ani sa Dabkayan sa Sugbo, gumikan kay ang maong umento sa plitehan dili solusyon.
Dugang pa, nga kung mopasaka sila sa pletehan apektado usab ang mga drayber mahitungod kay apil ang ilahang pamilya nga makigsangka sa pagsaka sa presyo sa plite, palaliton, ug serbisyo kon adunay mga sunod-sunod nga pagtaas sa presyo sa lana.
Subling gipasabot sa Piston Cebu nga ang mas maayong solusyon anaa gihapon sa pagtangtang dayon sa buhis sa lana ug pagpaaktibo sa kamot sa gobyerno sa pagkontrolar sa suplay ug pag-regulate sa presyo sa mga produkto sa lana.
Kahinumduman nga ni pasalig ang LTFRB nga mo distribute og cash aid sa kinatibuk-an nga 1.64 milyones ka PUV drivers nga iapud-apod.
Kung diin, ipanghatag ang P10,000 alang sa mga drayber sa modernong jeepney ug UV Express, samtang P6,500 alang sa mga drayber sa tradisyonal nga jeepney makadawat usab ug P1,000 matag usa ang mga tricycle driver, ug P1,200 sa matag delivery driver.
Apan, tubag sa Piston Cebu nga dili paigo ang maong hinabang, mahitungod nga ang P6,500 nga fuel subsidy mabayran lang sa mga 24 ka adlaw nga kantidad sa nawala nga kita sa mga apektado nga mga drayber.
