CEBU CITY-Magpadayon sa pagpahigayon og mga last minute nga mga lihok protesta ang mga sakop sa Pinagkaisang Samahan ng mga Tsuper at Opereytor Nationwide (PISTON) Cebu.
Mao kini ang gibutyag ni Greg Perez, ang pangu sa PISTON Cebu.
Matod pa niini nga padayun ang ilahang pag-protesta hangtod na sa umaabot nga bulan sa Enero.
Dugang ni Perez nga ilahang gihingusgan ang maong kalihukan gumikan kay liboan ka mga drivers ug operator ang apektado sa December 31 nga deadline sa consolidation program sa gobyerno.
Matod usab sa pangu sa PISTON Cebu nga usa ka magul-anon nga bag-ong tuig unya ang musugat kanila gumikan sa nag-ung-ong nga deadline sa naasoy nga programa.
Hinungdan nga pabilin nila nga barugan ang pagpadangat sa ilahang mga yangongo ug mga demanda ngadto sa nasudnong kagamhanan ilabi na sa administrasyong Marcos.
Gibutyag usab ni Perez nga dili kaya sa mga yanong driver nga makabayad og dakong utang o maka-afford og modern jeepney.
Rason nga ang giduso nga programa karun sa gobyerno, dugang palas-anon lang sa mga drivers ug operators sa nasud.
Subay sa maong balita, subli nga gipanawagan sa grupong PISTON ngadto sa mga drivers, operators, ug sa publiko nga musalmot sa ilahang pagahimuong protesta sa mga umaabot nga adlaw.
