PROVINCE OF BOHOL- Padayon nga gihingusgan sa kapolisan sa Bohol ang pagbantay batok sa krimen nga gihimo kontra sa kababayen-an atol sa selebrasyon sa Women’s Month.
Sumala ni Police Captain Girlie Tolop, Chief sa Women and Children Protection Desk sa Police Provincial Office sa Bohol, padayon nilang gipalig-on ang mga programa ug kampanya aron mapanalipdan ang kababayen-an ug kabataan batok sa bisan unsang matang sa pang-abuso.
Matud ni Tolop, dako kaayo og papel ang Women and Children Protection Desk sa pag-atiman sa mga kaso sa violence against women and children aron masiguro nga dili mapasagdan ang mga biktima.
Dugang pa niya, lakip sa ilang gipalig-on nga kampanya ang ‘Men Opposing Violence Everywhere Campaign’, nga nag-awhag sa mga kalalakihan nga mahimong kabahin sa pagpakunhod sa mga insidente sa kapintasan batok sa kababayen-an ug kabataan.
Gipasabot usab ni Tolop nga gihatagan nila og dakong importansya ang performance sa mga police investigators sa matag estasyon, ilabi na kadtong nakahimo og daghang kaso nga naipasaka sa korte, isip pagdasig nga mas mapalig-on pa ang pag-atubang sa mga krimen nga may kalabotan sa kababayen-an ug kabataan sa lalawigan.
