CENTRAL VISAYAS- Nakamugna og importanteng lakang sa kalinaw ang mga sakop sa kapulisan sa Central Visayas, kini human nasikop nila ang kapin sa 267 nga mga indibidwal nga nakalapas sa balaod sulod lamang sa 72-ka oras.
Ang naasoy nga ihap, gilangkuban sa kalihokan sa ‘illegal nga droga” ug paghupot sa ‘dili lisensyadong armas’.
Nakatala usab ang PRO-7 sa 1.926 kilograms sa illegal nga Drogas nga mobalor sa P8.2-milyones sulod sa 91-ka mga anti-drug operations niini niadtong Oktubre 21 hangtud 23 diin 99 ka mga indibidwal ang nasikop.
Sa illegal nga sugal usab, naka-apprehend ang PRO-7 og anaa sa 97-ka mga indibidwal ug nakasakmit ang kapin sa P9,100 sa cash.
Samtang sa operasyon sa illegal nga paghupot sa armas, adunay 11-ka mga indibidwal ang nasikop og 18 ka armas ang nakuha nga may kalapasan sa Comprehensive Firearms and Ammunition Regulation Act (Republic Act 10591).
Sa mga wanted persons usab, naka-apprehend ang mga sakop sa kapulisan ug anaa sa 7-ka mga most wanted, samtang 53 ang giklasipikar nga wanted persons.
Gidayeg ni Police BGen Anthony Aberin ang maong malampusong kampanya sa kalinaw sa iyang sakop nga matod pa niya “Kini nga padayon nga mga paningkamot sa mga pulisya hinungdanon sa pagkunhod sa krimen ug sa katapusan, pagpalambo sa serbisyo sa pulisya nga gitumong sa pagpasiugda sa usa ka luwas nga palibot alang sa mga residente ug magpatigayon sa Central Visayas.”
