CENTRAL VISAYAS-Gisugdan na sa Police Regional Office 7 ang pagpahigayon ug imbentaryo sa posibli nga mga ‘areas of concern’, ingon man mga hot spots alang sa Barangay ug SK elections (BSKE).
Gikatakda nga magtagbo ang composite teams sa Commission on Elections, Philippine National Police, Armed Forces of the Philippines arun magtukod ug Regional Joint Security Control Center alang sa umaabot nga piniliay.
Gibutyag ni Police Lieutenant Colonel Gerard Ace Pelare, ang tigpamaba sa PRO 7 nga kasamtangan nilang gipanid-an ang mga lugar diin nakatala ug kasamok sa mga nakalabay nga piniliay.
Matud pa, sugdan na sa PNP ang paghimo sa ilahang security plan alang sa BSKE sunod buwan.
Sa pagkakarun, gipahibalo ni Pelare nga usa sa mga lugar nga tuyong pabantayan ni PRO 7 Director Brigadier General Anthony Aberin mao ang Negros Oriental subay sa nahitabong pagpatay kang anhing gobernador Roel Degamo ug laing walo pa.
Una nang mimando si Aberin sa tanang hepe sa mga police stations sa Central Visayas sa pag-monitor sa tanang mga barangay nga sakop sa ilahang hurisdiksyon arun nga malikayan ang mga kagubot nga mahitabo.
