CENTRAL VISAYAS-Walay nakitang problema ang Police Regional Office 7 sa unang adlaw sa public consultation sa Commission on Elections (COMELEC) uban sa kapulisan ug armadong kusog sa Pilipinas sa tinguha nga pag postpone sa Barangay ug Sanguniang Kabataan elections sa Oktubre sa tibuok probinsya sa Negros Oriental.
Kini subay sa nahitabong insidenteng pag pusil patay kang Gobernador Roel Degamo ug pagka angin sa laing siyam pa ka kinabuhi niadtong Marso 4, 2023 sa lungsod sa Pamplona.
Matod ni Police Lieutenant Colonel Gerard Ace Pelare, ang spokesperson ni Police Brigadier General Anthony Aberin, nga gawasnon nga naka salmot ang mga molopyo sa Negros Oriental sa maong public hearing sanglit sila ang mag buot kung angayan ba nga i-uswag ang piniliay sa mga opisyal sa barangay sa maong lalawigan.
Nangunay mismo si Aberin sa pag supervise sa siguridad sa tibuok probinsya aron masiguro nga ang mga molopyo sa maong lalawigan maka salmot ug madungog ang ilang mga tinguha.
Gihulagway usab ni Pelare nga nibalik na sa normal ang sitwasyon sa tibuok probinsya human sa dugoon nga insidente tungod sa daghang presensya sa kapulisan ug kasundalohan.
Nagpabilin ang pwersa sa mga sundalo ug kapulisan sa Negros Oriental kay duna pa silay gipangita nga mga suspetsado sa pag pusil patay kang Degamo ug sa laing siyam nga nakalas apan wala ni magpasabot nga kahadlokan pa ang tibuok probinsya.
Gipasigarbo ni Pelare nga luwas nga suroyan ang tanang dapit sa Negros Oriental itandi sa nanglabay nga mga buwan nga wala pa gipakatap ang mga police ug sundalo.
