Pila nalang ka pamilok, ug pila nalang katulog,magsad-sad na usab ang Sugbuanon, ug ubang mga bisita aron mosalmot sa dinagsa nga Fiesta sa Sugbo—ang Sinulog Festival 2026.
Subay niini, ang pagpangandam ug mga preparasyon sa naasoyng kapistahan, matod pa “everything is in place.”
Mao kini ang gikabutyag ni Peace and Order Chairman-Cebu City Councilor Philip Zafra atol sa pakighinabi sa Bombo Cebu Newsteam, nga nahiluna na ang tanang preparasyon alang sa Sinulog 2026, ug gani, nagpahigayon na sila og sunod-sunod nga mga meetings, ug weekly meeting alang sa social welfare committtee ubos sa pagdumala ni Councilor Paul Labra.
Dugang ni Zafra, nga ig Lunes, Enero 5, mag meeting sila pag-usab aron sutaon og paglantawan kung unsay maayong detalye sa inadlaw-adlaw nga kalihokan nga sugdan sa Huwebes, Enero 8.
Giklaro usab ni Zafra nga aduna nay security plan ang Cebu City Police Office ubos sa pagpangu ni CCPO Chief Col. George Ylanan.
Gitataw usab niya nga manghinaot sila nga mangayo og augmentation sa PRO-7.
Gani, iyaha usab naasoy nga nalakip nilang gihangyo ang nagkalain-laing mga tunghaan nga mopakatap usab sa ilang mga ROTC Cadettes.
