Nipadayag og kabalaka ang Philippine Coast Guard (PCG) sa nakit-ang presensya sa usa ka Chinese Coast Guard (CCG) vessel, nga giila nga CCG 5901, duol sa Exclusive Economic Zone (EEZ) sa Pilipinas.
Kini nga barko, nailhan nga ‘monster ship’ tungod sa gidak-on niini nga 12,000 ka tonelada, nga mas dako kaysa kinadak-ang barko sa PCG ug namatikdan gikan sa 54 nautical miles sa dapit sa Capones Island sa Zambales.
Gamit ang Dark Vessel Detection System sa Canada, gikumpirmar sa PCG ang pagkakita sa Chinese vessel gabii, ug gipadala dayon sa PCG ang BRP Cabra, usa ka helicopter, ug ang PCG Caravan aron masubay ang maong barko.
Unang gikataho ang barko sa CCG duol sa Scarborough Shoal nakit-an usab nga naglihok sa kasadpan nga direksyon ug katapusang nakita 85 nautical miles gikan sa Zambales.
Gitataw sa PCG nga ang presensya sa barko sa China, sulod sa EEZ sa Pilipinas, usa ka hagit sa soberanya sa Pilipinas ug gisubli sa mga awtoridad sa Pilipinas ang ilang pasalig nga protektahan ang mga mangingisda nga Pilipino nga naglihok niining mga katubigan, ug pagsiguro sa ilang kaluwasan ug pag-access sa kadagatan sa Pilipinas nga walay harasment.
