Mibiyahe na paingon sa India si Presidente Bongbong Marcos, kauban ang Unang Ginang nga si Liza Araneta-Marcos ug pipila ka mga miyembro sa Gabinete, alang sa lima ka adlaw nga state visit nga naglakip og bilateral nga panaghisgotan gikan Agosto 4 hangtod 8, 2025.
Sa wala pa molarga, nihatag sa iyahang departure statement ang Presidente sa Villamor Air Base sa Pasay City.
Sumala niini, ang maong pagbisita nagtumong sa pagpahugot sa diplomasya ug kooperasyon sa ekonomiya tali sa Pilipinas ug India.
Matud sa Department of Foreign Affairs (DFA), nga sa New Delhi, makigtagbo ang Presidente sa mga opisyal sa India ug uban pang importante nga stakeholders, lakip na ang bilateral meeting uban ni Prime Minister Shri Narendra Modi.
Pagahisgutan nila ang posibilidad sa mas lawom nga kooperasyon sa mga isyu sama sa ekonomiya, depensa, seguridad, politikal nga relasyon, patigayon, pamuhunan, ug mga kalihukan tali sa katawhan sa duha ka nasod.
Gilauman usab nga magtinabangay sila sa paghisgot sa mga rehiyonal ug internasyonal nga isyu nga may kalabutan sa duha ka nasod.
Pagkahuman sa mga kalihukan sa New Delhi, mopaingon si Presidente Marcos sa Bangalore aron ipadayon ang pakigpulong sa sektor sa negosyo sa India, nga tuyo nga mas palig-on pa ang ekonomikanhong relasyon.
Ang maong state visit nagtimaan usab sa ika-75 nga anibersaryo sa diplomatikong relasyon sa Pilipinas ug India, nga nagpakita sa ilang paningkamot sa pagpadayon sa kooperasyon ug pag-abot sa komon nga mga tumong sa rehiyon.
