Giisip sa usa ka grupo sa mga mag-uuma nga “makatarunganon” ang pagbanabana nga ang presyo sa bugas mahimong moabot sa P60 hangtod P62 kada kilo sa Setyembre.
Sa usa ka interbyu, miingon ang Chairman sa Magsasaka Partylist nga si Atty. Argel Cabatbat nga bisan pa sa gipaabot nga pagtaas sa presyo, makatabang kini sa mga mag-uuma sa pag-compensate sa padayon nga pagsaka sa gasto sa produksiyon, ilabina sa abono.
Apan giklaro ni Cabatbat nga wala gihapon kini nagpasabot og dako nga ganansya para sa mga mag-uuma tungod kay nagpabilin nga taas ang presyo sa mga input sa umahan.
Matud niya, kon magdaginot sa abono ang mga mag-uuma, posibleng mokunhod ang ani nga makaapekto usab sa ilang kita.
Naglaum ang grupo nga mapabilin sa lebel nga dili molapas sa P60 hangtod P62 ang presyo sa bugas aron dili mabug-atan ang mga konsumidor. Tumong sa grupo ang pagkab-ot sa patas nga presyo alang sa mga mag-uuma ug mga konsumidor.
Gipahayag usab ni Cabatbat ang iyang kabalaka sa nagpadayon nga tensyon sa Middle East, nga posibleng hinungdan sa domino effect sa pagsaka sa presyo sa lana ug uban pang palaliton, lakip na ang bugas.
