Lagmit mosaka usab ang presyo sa bugas sa nasud ngadto sa P60- P62 kada kilo sa buwan sa Septyembre, sumala ni Agriculture Secretary Francis Tiu Laurel Jr.
Atol sa usa ka hearing sa Senate Proactive Response and Oversight for Timely and Effective Crisis Strategy (PROTECT) Committee, si Laurel miingon nga ang gilaumang pagtaas tungod sa pagtaas sa gasto sa abono, nga halos nadoble gikan sa P1,650 ngadto sa P3,000.
Gipasabot niya nga kon ang mga mag-uuma magpadayon sa tradisyonal nga paggamit sa urea ug dili mobalhin sa alternatibong abono nga girekomenda sa Department of Agriculture (DA), ang gasto sa produksiyon mosaka, nga moresulta sa mas taas nga presyo sa bugas.
Gidugang sa kalihim nga ang DA nagtuon na sa daghang mga lakang aron mapugngan ang pagtaas sa presyo, lakip ang pagpatuman sa “rice blend” ug “corn blend.”
Ang rice blend usa ka sagol nga imported ug lokal nga bugas, sama sa 70-30 o 60-40 ratio, aron mapadayon ang suplay ug matabangan ang mga mag-uuma.
Samtang, ang corn blend usa ka kombinasyon sa puti nga mais ug bugas sa 50-50 nga proporsyon isip alternatibong pagkaon.
Ang gobyerno giingong padayon nga nangita og mga paagi aron magpabiling barato ang presyo sa bugas taliwala sa nagkataas nga gasto sa produksiyon.
