CEBU – Gimanduan sa taas nga opisyal sa Police Regional Office sa Central Visayas (PRO-7) ang Bayawan City Police Station sa Negros Oriental nga mohimo og hot pursuit operation batok sa mga sad-an nga nipusil patay sa usa ka pulis gikan sa Regional Mobile Force Battalion 7 sa Barangay San Roque sa maong dakbayan gahapong adlawa Lunes, Agosto 15, 2022.
Sa press release, giila ni Police Brigadier General Roque Eduardo Vega, PRO-7 director, ang biktima nga si Police Corporal Rey Agusstillo Ambo, 37, personnel sa 705th Maneuver Company, Regional Mobile Force Battalion (RMFB-7), nga nadestino sa Sitio Nagbagang, Barangay Poblacion sa Santa Catalina, Negros Oriental.
Sa report sa kapulisan, si Ambo kauban ni Patrolman Rhullin Mar Abrasaldo ug nagpatrolya sa Barangay San Roque dihang nahitabo ang insidente, Subay niini, ang duha nagtigom og impormasyon, niadtong higayona, sa gikatahong presensya sa giingong mga sakop sa Communist Terrorist Group sa nahisgutang barangay.
Samtang nagbuhat sa ilang trabaho, gipabuthan sila sa wala mailhing mga tawo gamit ang kalibre 9mm nga armas nga KG-9, hinungdan nga Naigo si Ambo ug namatay sa pagpamusil.
Wala maunsa ang kauban sa biktima nga si Abrasaldo human kini makatago sa mga mamumuno, ug nanawag dayon si Abrasaldo og tabang.
Gawas kang Ambo, usa ka menor de edad ang gikatahong naigo ug nakaangkon og samad pinusilan, kung diin gidala dayon sa Bayawan District Hospital alang sa gikinahanglang medikal nga pag-atiman.
Sa pag-suwat ning balita, padayon pa ang gihimo sa kapulisan sa Bayawan City sa pag-ila sa posibleng mga sad-an sa maong pagpamusil.
