CEBU CITY — Mipadayag ang Philippine Sports Commission (PSC) nga nagkahiusa ang tibuok Pilipinas alang sa umaabot nga 30th Southeast Asian Games nga magsugod karong Nobyembre 30.
Kini ang nahimong pamahayag ni PSC Commissioner Ramon Fernandez atol sa Ceremonial Torch Relay niadtong Sabado, Nobyembre 16 sa South Road Properties, dakbayan sa Sugbo.
Matud ni Fernandez nga andam na ang mga atleta nga mosalmot sa managlahing sporting events sa SEA Games.
Hinungdan nga mihangyo kini sa mga Sugbuanon og pag-ampo alang sa kalampusan sa mga pambato sa nasud.
Nanghinaut usab si Fernandez nga mahimong overall champion ang Pilipinas sa maong biennial sports competition sa rehiyon.
Samtang nahimong malampuson ang ceremonial torch relay niadtong Sabado diin wala panumbalinga sa kapin 6,000 ka mga Sugbuanon ang pagpang-uwan aron lang masuportahan ang kalampusan sa SEA Games.
Pipila sa mga nahimong torch bearers mao silang Cebu City Mayor Edgardo Labella, Presidential Assistant to the Visayas Secretary Michael Dino, Cebuano triathlete nga si Kim Remolino, ug uban pa.
Sunod nga ipahigayon ang torch relay sa Pampanga karong Nobyembre 23.
