Gipasidan-an ang publiko nga likayan usa ang pag-agi sa Sitio Telepono Brgy. Manipis human sa pagdahili sa yuta ug dili pa gayud hingpit nga maaagian.
Kini ang gipaambit ni Joy Tumulak, ang pangu sa City of Talisay Traffic Operations & Development Authority nga dili pa luwas ang dalan bisan paman nga adunay mga na-clear na ang Department of Public Works and Highways apan wala kini nagpasabot nga mamahimo na kini nga maagian.
Gidugang usab niini nga atol sa pagsusi sa lugar kay adunay nasigpatan nga liki nga posibleng moresulta sa laing pagdahili usab nga yuta.
Hinungdan nga gihangyo ang mga motorista ug mga residente nga moogamit og alternatibong agianan aron luwas sa peligro.
Kahinumduman nga nakuhaan sa video ang pagkahugno sa yuta pipila ka gutlo human milabay ang mga motorista ug dali usab nga gideklarar sa mga otoridad nga dili na maagian ang lugar.
