Naapektuhan ang inadlaw-adlaw nga kita sa mga Public Utility Jeepneys Operators ug mga driver sa Sugbo gumikan sa nahitabong linog diin ubay-ubay nga tunghaan sa Sugbo ang mideklarar nga walay klase.
Kini ang gisaysay ni Greg Perez, ang pangu sa PISTON Cebu diin iyang gitino nga work from home ang mga BPO employees gumikan sa kahadlok sa mga posibleng aftershocks nga motumaw.
Ingon man ang ubang katawhan nga dili ganahan manglaag tungod sa peligro nga dala sa katalagman.
Gidugang pa ni Perez nga nakuhaan ang ilang kita sa dili moubos og usa ka libo ka pesos matag adlaw hinungdan nga mihangyo ang mga drivers ngadto sa operator nga minusan ang ilang abangan.
Sa pikas bahin, gipaambit usab niini nga ilang tun-an ang pagsalmot sa lihok-protesta sa kaulohan sa grupong Manibela may kalabutan sa DOTr-SAICT nga grabe ang pagpamig-ot sa mga drivers ngadto sa kadalanan.
