Gihisgutan sa House Quad Committee nga si kanhi Presidente Rodrigo Duterte nakigtagbo sa pipila ka alumni sa Philippine National Police Academy kalabot sa iyang kontrobersyal nga gubat batok sa drugas.
Ang miting nahitabo niadtong Hunyo 28, 2016 pipila ka adlaw sa wala pa siya milingkod sa pagka-presidente.
Kung diin ang nasangpit nga tigom nahitabo sa ikaduhang andana sa Department of Public Works and Highways (DPWH) building, diin mitambong ang mga sakop sa Philippine National Police Academy (PNPA) Classes of 1996 ug 1997, diin kadaghanan kanila adunay dakong papel sa anti-drug operations niadtong mayor pa siya sa Davao City.
Gikwestiyon sa mga magbabalaod kon aduna bay importanteng tahas ang nasangpit nga tigom sa pagpasiugda sa bangis nga gubat batok sa drugas ilabi na ug gituki ang “Davao Template.”
Gikompirmar usab sa usa ka resource person nga anaa usab sa venue si Senador Christopher “Bong” Go apan wala siya moapil o moapil sa maong tigom.
Wala na-kompirmado kung anaa ba usab si kanhi PNP Chief ug karon Senador Bato Dela Rosa sa maong tigom.
Samtang sila si retired Police Colonels Royina Garma ug Edilberto Leonardo parehong mikompirmar sa maong panagtagbo, ug usa kini ka “courtesy call” ngadto kang kanhi presidente Duterte.
Si Garma, sakop sa PNPA Class 1997, niangkon nga nahisgotan siya sa “Davao Template” meeting, samtang si Leonardo, sakop sa PNPA Class 1996, walay nahinumdoman bahin sa kontrobersiyal nga estratehiya nga gihisgutan sa maong tigum.
Gikwestiyon usab sa Komite si Col. Hector Grijaldo Jr., sakop sa PNPA Class 1997, kinsa mitambong usab sa maong tigom apan mihimakak nga ang “Davao Template” maoy gituki.
