CEBU CITY – Gituohan ni Dr. Clarita Carlos, UP-Diliman Political Science Professor, nga adunay lain nga rason ang pagduso ni Solicitor General Jose Calida ug quo warranto petition batok sa ABS-CBN.
Gipasabot ni Dr. Carlos nga nakalatid sa Konstitusyon nga mag-agi gayud sa mga magbabalaud ang kalabot na sa prangkisa sa nahisgutang media network, ingon man sa uban pa, hinungdan nga iyahang gituohan nga adunay buwag nga rason sa lakang nga gihimo ni Calida.
Matud pa nga dili usab mahitabo ang constitutional crisis gumikan kay mutumaw lang kini kung ugaling adunay pag-sinapaway sa ilahang hurisdiksyon ang Executive, Legislative, ug Judiciary branch sa gobyerno.
Napanglantawan niini nga wala may gisapawan nga gahum si Calida sa gihimo niini nga pagduso ug quo warranto petition batok sa mao nga network.
Samtang, walay nakita ang nahisgutang propesor nga adunay kalabotan sa press freedom ang maong hisgutanan inay posibling adunay laing isyu nga kinahanglan nga husayon sa korte.
