CEBU – Dili na kinahanglan nga magluwat pa ug Executive Order si Cebu City Mayor Michael Rama sa bag-ong gipagawas nga kamandoan sa Malakanyang nga boluntaryo nga pagsul-ob ug facemask sa mga ‘indoor spaces’.
Matud pa sa mayor nga gikinahanglan nga tutokan ang pag-rekober sa ekonomiya hinungdan nga gikinahanglan na usab ang pag-abli sa tanan ug dungan niini ang opsyonal nga pagsul-ob ug facemask.
Giingong gikapoy na ang mga tawo nga maminaw kalabot sa COVID-19 hinungdan nga dili na kini angayang hisgutan.
Samtang, kalinaw sa panghunahuna ang bugtong gipangayo sa mayor alang sa iyahang adlaw nga natawhan ugmang adlawa, Oktubre 28.
Sigon pa, nagkinahanglan kini sa mga tawo nga misalig kaniya ug sa iyahang administrasyon alang sa pagpatunhay sa iyahang mga plano sa dakbayan.
Subli nga gihinginlan sa opisyal ang mga tawo nga nag-duda ug nangita lang ug sayop sa iyahang tinguha nga Singapore-like Cebu City, ug giingong mamahawa na lang sa dakbayan ug mubalhin na lang ug puyo.
