CEBU – Gimanduan ni Cebu City Mayor Michael Rama ang tagdumala sa Cebu City Medical Center (CCMC) sa pagsiguro nga ang tanang trabahante sa tambalanan makadawat ug COVID-19 booster shots.
Sa giluwatang pamahayag sa Cebu City Public Information Office (PIO), si Rama gikutlo nga nagkanayon nga kadtong nakadawat na sa ilang unang booster shot kinahanglang mokuha usab sa ilang ikaduhang dosis.
Kini nga niluwat ni Rama iyang pahinumdom nga gitumong ngadto kang Dr. Anton Oliver Reposar II, ang medical director sa CCMC, human ang Department of Health sa Central Visayas (DOH-7) nipagawas og memorandum niadtong Hulyo 26 sa pagmando sa mga hepe sa lain-laing health facilities sa rehiyon sa pagsiguro nga ang tanan nilang mga trabahante makakuha sa ilang booster shot sa dili pa molapas sa Sept. 30, 2022.
Ang kagamhanan sa dakbayan sa Sugbo maoy nagmintinar ug nag-operate sa CCMC.
Hinungdan nga si Dr. Jaime Bernadas, ang DOH-7 director, niisyu sa memorandum human ang report nagpakita nga 67.1 porsiyento lang o 88,566 sa 131,989 ka mga rehistradong hospital workers sa rehiyon ang hingpit nang nabakunahan ug nakadawat na og COVID-19 booster shots.
Kung diin ang report sa DOH-7 nagpakita usab nga niadtong Hulyo 24, 9,292 lang ka mga trabahante sa ospital ang nakadawat sa ilang ikaduhang booster shot.
Gitugotan na sa DOH ang paghatag ug second booster shot sa mga frontline health workers ug senior citizens.
