CEBU CITY-Nangayo og pasaylo ngadto ni Cebu Provincial Governor Gwendolyn Garcia ang rapper nga si Brandon Perang alyas ‘innocent loco’ kinsang nagbugal-bugal sa balaud sa curfew kahabin sa general community quarantine.
Kini human nga nasikop ang rapper human nagpost-post sa iyang facebook ug gi pakauwawan usab sa gobernadora sanglit hugot ang pagpatuman sa probinsya sa quarantine apan gibugal-bugalan lamang.
Nagpakilooy ang naasoy nga rapper sa gobernadora nga pasayloon siya ug misaad kini nga dili na siya muusab sa iyang pagbugal-bugal ug sa wala pagrespeto sa balaud.
Gi-angkon usab ni Perang nga nasayop kini ug nagkanayon nga tao lang siya, masayop ra usab.
‘Himoong ehemplo’
Desidido gyud si Cebu Provincial Governor Gwendolyn Garcia nga mupasaka og kaso sa rapper nga si Innocent Loco bisan paman kini og nangayo na og pasaylo kaniya ug sa Cebu Provincial Government.
Gihimug-atan ni Garcia nga himoon niya nga ehemplo o panig-ingnan ang rapper nga si Brandon aron nga dili musoon ang uban. Duna matud pa’y nalapas si Brandon nga provincial ordinance ug kung pasayloon niya kini basin unya og dili na makasalig pa ang provincial board nga nagpalabang niining maong ordinance nga magpahamtang og silot sa makalapas sa gipagawas nga Executive Order (EO) ni Garcia isip tipik sa precuationary measures batok sa COVID-19.
Gidugang usab ni Garcia nga dili siya pwede mukalma kabahin sa kalapasan ni Brandon gani, frustrated pa ang gobernadora gumikan kay taliwa paman sa krisis nga gi-atubang karon sa nasud, duna pa gihapon matud pa’y mga indibidwal nga sama kang Brandon nga magbugal-bugal ug dili murespeto sa balaud.
Gipanawagan na usab karon ni Garcia sa kapulisan nga panghingusgan ang pagtrace sa mga bashers ug ang pagbugal bugal sa mga lagda nga gipatuman sa probinsya.
