CEBU CITY-Gi-imbestigaran na karon sa PDEA-7 ang recipient o ang mudawat unta sa mga item nga nasakmit sa PDEA-7 niadtong Sabado sa gabii, Agosto 15 diin nasakmit ang P88-M nga balor sa shabu.
Kini ang gikompirmar ni Levi S. Ortiz ang Regional Director III sa PDEA-7 diin gisaysay usab niini sa Bombo Radyo Cebu atol sa tulumanong Zona Libre nga subay sa ilang follow up operation diin gibutyag sa usa sa ilang dinakpan nga ang tinubdan sa shabu ang gikan sa mga land trips diin ipaagi kini og mga courier services.
Hinungdan nga nagpahigayon og routine random inspection ang PDEA-7 sa warehouse sa mga courier ug ingon man sa mga pantalan ug didto nadiskubre ang binultong mga shabu nga gisulod pa sa LED lights.
Matud ni Ortiz nga witness nila karon ang courier nga maoy nagdala sa maong item ug gibutyag usab niini nga ang recipient sa maong mga item ang naa usab sa ilang watchlist ug nagpuyo ra sa Cebu City
Wala na hinoon mihatag pa og dugang detalye ang director sanglit padayon man ang imbestigasyon.
Apan pasakaan na og kaso sa ahensya ang shipper ug ang recipient sa maong mga nasakmit nga item nga gisudlan sa naasoy nga mga binultong shabu.
