PROVINCE OF CEBU- Gikalipay ni ABC President and ex-official Cebu Board Member Celestino “Tining” Martinez III ang kalambuan sa pagpasar sa iyang gipangamahang ordinansa sa konseho sa Kapitolyo sa Sugbo nga mao ang pag-istablisar pagbalik isip full department status sa buhatan sa Cebu Provincial Disaster Risk Reduction and Management Office (PDRRMO).
Kini ang eksklusibong gisaysay ni Martinez sa pakighinabi sa Bombo Radyo Cebu News Team niini human sa regular session sa Provincial Board niadtong Lunes, Septiyembre 15.
Nagtinguha kini sa pagpalambo sa maong buhatan aron mas daghan personahe, kapabilidad, ug ekipo sa pagtubag sa mga katalagman nga muigo sa bisan asang bahin sa probinsya.
Gipanglantawan na karon ang hinay-hinay nga pagtukod sa operasyon sa Cebu PDRRMO nga pangulohan ni Ret. Col. Denise Pastor diin pipila sa mga tahas niini ang pagbuhat og management plans ug pagdugang sa mga personahe niini.
Kahinumduman nga sa nakalabayng administrasyon ni former Cebu Governor Gwendolyn Garcia kay gi-downgrade ang PDRRMO isip usa nalang ka division sa Office of the Governor nga nagputol niini sa pundo ug gahum nga nakapa-inutil sa buhatan.
