CENTRAL VISAYAS-Gilaraw sa Philippine Fisheries Development Authority (PFDA), usa ka attach agency sa Philippine Agriculture nga magtukod ug regional fishport sa Central Visayas.
Kini magdugang sa kalamboan sa Kabisay-an, ilabi na nga dinhi mismo sa lalawigan sa Sugbo tukoron ang maong pantalan.
Kung maaprobahan, makabaton na unya ug regional fishport ang Central Visayas dinhi mismo sa Sugbo human nga misugyot si PFDA General Manager, Atty. Glen Pangapalan.
Matud ni Atty. Pangapalan nga gipili nila ang lalawigan sa Sugbo gumikan kay sentro kini sa ekonomiya sa Kabisay-an, ingon man arun nga matabangan ang sektor sa mga mananagat.
Subay niini, gihangop ni Cebu Provincial Governor Gwendolyn Garcia ang maong sugyot ug muhatag kini sa iyahang suporta alang sa katumanan sa maong proyekto.
Gani, ning sugyot si Governor Garcia nga mas maayo tukoron kini sa strategic nga lugar nga accessible sa tanang fishing vessels ug dili lang sa Sugbo, inay lakip na sa mga silingan nga mga lalawigan sama sa Bohol, Negros Oriental ug Siquijor.
Gibana-bana nga mukabat sa 8-hectare nga pantalan ang tukoron, ug arun nga masuta ang haum nga lokasyon niini, magtinabangay ang PFDA ug ang Kapitolyo sa pag-ila ug pagpatuman sa maong proyekto.
