Gihangyo ni Akbayan Partylist Representative Chel Diokno ang House Committee on Justice nga ibalhin ang nadakpan ug nagpailang bagman ug kanhing aide ni Bise Presidente Sara Duterte ngadto sa ilang kustodiya taliwala sa mga hulga sa iyang seguridad.
Sa usa ka pahayag, gikumpirmar sa magbabalaod nga nagpadala siya og sulat kang Committee chair Representative Gerville Luistro nga naghangyo nga ibalhin si Madriaga ngadto sa kustodiya sa Committee on Justice aron masiguro ang iyang seguridad ug kaandam sa pagtestigo atubangan sa komite sa hustong panahon.
Gibutyag ni Diokno nga si Madriaga usa ka importanteng saksi sa impeachment proceedings batok sa Bise Presidente.
Samtang, si Diokno mihangyo usab alang sa pag-isyu og “subpoenae duces tecum” o mando sa pagdala og mga dokumento/ebidensya alang sa pagsumite sa mga rekord sa gobyerno.
Sumala ni Rep. Diokno, ang mga dokumento importante alang sa komite aron makadesisyon kung adunay igo nga basehan sa impeachment.
Lakip sa mga hangyo ni Diokno mao ang komprehensibo nga pagrepaso sa mga kabtangan ug opisyal nga pamatasan sa Bise Presidente.
Nangayog sertipikado nga mga kopya sa mga pinansyal nga pagbutyag o SALN ni Duterte gikan sa 2007 hangtod 2025 gikan sa Office of the Ombudsman ang magbabalaod aron marepaso sa komite ang iyang kinatibuk-ang gideklarar nga mga kabtangan samtang naa sa serbisyo publiko.
Gimandoan usab niya ang Anti-Money Laundering Council nga mangayo og sinumpaang sertipikasyon bahin sa bisan unsang kadudahang mga transaksyon nga mahimong may kalabotan kang VP Sara, sa iyang bana, o sa iyang amahan, aron mahibal-an kung adunay wala matino nga bahandi o wala gideklarar nga mga kabtangan.
Apil usab sa iyang hangyo ang tanan nga mga dokumento sa imbestigasyon gikan sa National Bureau of Investigation bahin sa giingong mga hulga sa Bise Presidente batok kang Presidente Ferdinand Marcos Jr., Unang Ginang Liza Araneta-Marcos, ug kanhi House Speaker Martin Romualdez.
Sumala ni Diokno, gilauman nga hisgutan sa Committee on Justice kini nga mga hangyo sa sunod semana, nga mahimong magsilbing sinugdanan sa pormal nga hugna sa pagkuha og ebidensya ug opisyal nga mga rekord.
