Misang-at og resolusyon si House Speaker Martin Romualdez ug Tingog Partylist pormal nga nga nagtinguha nga ma-institutionalize ang partisipasyon sa civil society groups isip opisyal nga non-voting observers sa budget hearings.
Base sa House Resolution Number 94, ang mga civil society groups tugotan na nga moapil sa mga hearing sa Committee on Appropriations aron mapalambo ang transparency ug people-centered governance.
Matod ni Romualdez, gusto nilang ipasiugda ang proseso sa budget nga tinud-anay nga maminaw sa katawhan bisan sa pagsugod pa lang sa deliberasyon.
Sa higayon nga maaprobahan na ang maong resolusyon, sa dili pa magsugod ang 2026 budget, ang mga organisasyon ma-accredit ug tugotan sa pag-apil isip non-voting observers sa tanang public hearings sa Appropriations Panel ingon man sa mga sub-committees niini.
Sa gisugyot nga mga giya, ang komite sa pakigtambayayong sa People’s Participation Panel maoy magdeterminar sa eligibility, accreditation process ug scope sa partisipasyon sa civil society groups subay sa House rules.
Ang maong resolusyon naghisgot sa Sections 15 ug 16, Article XIII sa 1987 Constitution nga nag-ila sa katungod sa katawhan ug sa ilang mga organisasyon sa pag-apil sa pagdesisyon ug pagpanalipod sa ilang interes.
Dugang pa ni Romualdez ug sa mga representante sa Tingog Partylist nga ang mga organisasyon sa katawhan gikan sa sektor sa edukasyon, panglawas sa publiko, kaayohan sa katilingban, kalikupan, agrikultura, ug lokal nga panggobyerno makahatag ug kritikal nga kahanas aron mahimong mas “responsive” ug “grounded” ang pondo. |Bombo Nathaniel Sandoval
