Giakusaran ni House Committee on Public Accounts ug Bicol Saro Partylist Rep. Terry Ridon si Bise Presidente Sara Duterte sa paglimbong sa Korte Suprema ug sa publiko kalabot sa iyang petisyon nga ihunong ang proseso sa impeachment sa House batok kaniya.
Sa usa ka pahayag, si Ridon miingon nga ang petisyon gibase sa sayop nga representasyon sa mga kamatuoran ug tinuis nga interpretasyon sa Konstitusyon ug sa kasamtangang jurisprudence.
Giinsistir sa Kongresista nga ang pag-refer sa upat ka impeachment complaints niadtong Pebrero 23, 2026 husto nga gihimo sa plenaryo sa House, ug dili lang kini usa ka aksyon sa liderato o komite.
Gihimakak usab ni Ridon ang pangangkon nga gikinahanglan ang deliberasyon sa dili pa ang referral, nga nag-ingon nga walay ingon niana nga kinahanglanon sa Konstitusyon, mga lagda sa House, o kasamtangang mga desisyon sa korte.
Sigon usab niini nga walay mga magbabalaod nga misupak o mihangyo og deliberasyon atol sa giingon nga sesyon.
Mahitungod sa one-year bar rule, gihimug-atan ni Ridon, nga walay paglapas tungod kay usa ra ka balido nga referral ang natala.
Dugang niini nga ang mga lakang sa House Committee on Justice, lakip ang pagdungog ug pagkolekta sa ebidensya, adunay igo nga legal nga basehan.
Bisan pa sa petisyon, gipasalig ni Ridon nga ipadayon sa Kamara ang proseso sa impeachment.
Ang mga dokumento gikan sa Ombudsman, BIR, ug SEC, ingon man ang mga testimonya sa mga saksi, gilauman usab nga ipagawas sa Abril 14.
Gipasiugda niini nga ang proseso magpadayon hangtod nga mahuman ang pagpanubag sa bise presidente sa sayop nga paggamit sa confidential ug intelligence funds sa OVP ug DepEd sa dihang siya ang kalihim sa ahensya.
